Eloksen ratas
Työnän mustokse kartočkan....

Ol’ga Ogneva
Tämä kartočku on otettu 30. kevätkuudu 1941. Sen kiändöpuolel fioletovoil černiläl on kirjutettu: ”Työnän mustokse kartočkan, t’outaine, mustele minuu” da nimikirjutus: NStaršinov (?).
Kuvas ollah kaksi saldattua bud’onnovkois, šinelilöis, kengät jallas da villazet kuvotut sormikkahat käis. Pienembi kazvol mies on Pavlovan Peša Kinelahtelpäi. Puavilan Semoil da Marpal häi oli vahnin poigu. Kartočkan otanduvuon hänel täydyi 21 vuozi. Briha otettih armieh vuvvennu 1939. Lähtijes häi jätti kost’uman kormanih lippuzen: ”Kodih enämbiä en tule”. Peša ei ehtinyh naija enne armieh otandua, omua perehty da lastu hänel ei olluh. Sit jo puhkei suuri voinu. Siepäi Peša ei ni tulluh kodih. Omile vai kirjutettih, ku häi ”hävii viestittäh”. Puolistusministerstvan keskusarhiivas on tieduo, ku mies ”hävii viestittäh elokuus 1941”.
Toizen kuvas olijan saldatan nimi on meile tundematoi. Tiijämmö vai, häi oli Pešan dovariššu, hyö yhtes sluužittih.